30. október 2024. Kolfinna Ólafsdóttir: Áhrif vaxtarörvandi jarðvegsbaktería á birki
Kolfinna Ólafsdóttir auðlindafræðingur hjá Náttúrufræðistofnun flytur erindið „Áhrif vaxtarörvandi jarðvegsbaktería á birki – möguleikar í landgræðslu og endurheimt vistkerfa á Íslandi“ á Hrafnaþingi miðvikudaginn 30. október 2024 kl. 15:15.
Erindið verður flutt í fundaraðstöðu starfsstöðvar Náttúrufræðistofnunar að Borgum við Norðurslóð, Akureyri. Það verður einnig flutt í beinni útsendingu á Teams á netinu.
Kolfinna lauk BS-prófi í líftækni 2021 og lauk MS-prófi í auðlindafræðum frá Auðlindadeild Háskólans á Akureyri haustið 2024 með áherslu á líftækni. Hún vann meistaraverkefnið (Towards sustainable land reclamation: Utilization of plant growth-promoting bacteria to enhance birch growth in eroded Icelandic soil) undir handleiðslu Margrétar Auðar Sigurbjörnsdóttur dósents við Auðlindadeild HA.
Í fyrirlestrinum verður greint frá niðurstöðum úr meistaraverkefni Kolfinnu þar sem sýnt er fram á mikilvægi baktería í jarðvegi en þar virðast þær stjórna mikilvægu jafnvægi moldarinnar og geta haft áhrif á vöxt gróðurvistar í sandauðnum. Markmið verkefnisins var að meta vaxtarörvandi áhrif íslenskra jarðvegsbaktería á plöntu, þá sérstaklega birki (Betula pubescens), til að nýta í uppgræðslu íslenskra sandauðna.
Verkefninu var skipt í tvo hluta, annars vegar könnun þekktra eiginleika jarðvegsbaktería sem hafa áhrif á vöxt plantna og hins vegar sannprófun niðurstaðna á ungum birkitrjám. Þekktir vaxtarörvandi þættir á borð við framleiðslu plöntuhormóna (t.d. indole-3-acetic acid), frumuboða, niturbindingu og nýtingu ólífræns fosfats voru kannaðir í jarðvegsbakteríum einangruðum úr íslenskri mold. Í seinni hluta verkefnisins voru þrír stofnar valdir og notaðir til að kanna áhrif þeirra á vöxt ungra birkiplantna. Birkiplöntur voru gróðursettar í jarðvegi frá Hólasandi með viðbættum bakteríustofnum og ástand plantanna metið eftir 16 vikna vaxtartímabil. Plöntur með viðbættum jarðvegsbakteríum, virtust heilbrigðari og í sumum tilfellum betur varðar gegn ryðsvepp sem finnst gjarnan í plöntum hérlendis. Þessar niðurstöður benda til að nýting jarðvegsbaktería sem umhverfisvænan lífáburð í uppgræðslu sandauðna á Íslandi er raunverulegur möguleiki sem vert er að skoða.